Leggið álög á Klose

Brasilíska goðsögnin Ronaldo vonast til þess að Miroslav Klose nái ekki að bæta met sitt á Heimsmeistaramótinu sem fer fram í Brasilíu í sumar.

Ronaldo er markahæsti leikmaðurinn í sögu Heimsmeistarakeppninnar með 15 mörk í þremur lokamótum. Klose er aðeins einu marki á eftir Ronaldo og er í leikmannahóp Þýskalands á mótinu sem fer fram í Brasilíu.

Klose viðurkenndi á dögunum að eitt af megin markmiðum hans væri að bæta met brasilísku goðsagnarinnar en Ronaldo bað aðdáendur Brasilíu um örlítinn greiða.

„Ég bið alla íbúa Brasilíu um að leggja álög á Klose, það væri gott. Ég mun biðja fyrir því að hann nái ekki að bæta metið en ef hann nær því nær hann ekki að eyða mér úr sögubókunum,“ sagði Ronaldo.