Falcao missir af HM

Staðfest hefur verið að Falcao, kólumbíski framherji Monaco, mun missa af Heimsmeistaramótinu sem fer fram í Brasilíu í sumar.

Falcao sleit krossband í hné í janúar en var bjartsýnn allt frá fyrsta degi að hann myndi ná mótinu. Hann hóf strax endurhæfingu og þrátt fyrir hetjulega baráttu er ljóst að hann verður ekki tilbúinn þegar flautað verður til leiks í næstu viku.

Hann var valinn í 30 manna HM-hóp Kólumbíu og tók þátt í léttum æfingum með liðinu en var ekki valinn í 23 manna lokahópinn. Kólumbía verður því án síns besta leikmanns á mótinu en í undankeppninni í Suður-Ameríku lenti Kólumbía í öðru sæti.