Sterling hefur einstaka hæfileika

Roy Hodgson, þjálfari enska landsliðsins, útilokar ekki að Raheem Sterling verði í byrjunarliði enska liðsins á Heimsmeistaramótinu sem hefst í næstu viku.

Sterling fékk rautt spjald fyrir ljóta tæklingu stuttu eftir að hann kom inná gegn Ekvador í æfingarleik fyrr í vikunni. Enskir fjölmiðlar fóru stuttu seinna að efast um að hann gæti höndlað pressuna.

Sterling verður í banni í seinasta undirbúningsleik Englands fyrir mótið gegn Hondúras á morgun en hann átti að byrja leikinn.

„Ég þarf ekki að sjá hann spila gegn Hondúras til að vita hvað hann hefur fram að bjóða. Hann átti að byrja leikinn gegn Hondúras og hann var gríðarlega svekktur með sjálfan sig eftir rauða spjaldið.“

Sterling gæti verið mikilvægur leikmaður fyrir enska liðið í Brasilíu að mati Hodgson.

„Hann er leikmaður sem getur haft mikil áhrif á leiki, hann hefur einstaka hæfileika,“ sagði Hodgson.