Fyrirliði Rússa úr leik

Roman Shirokov, fyrirliði rússneska landsliðsins í knattspyrnu, verður ekki með á HM í Brasilíu vegna meiðsla. Þetta var tilkynnt eftir 2-0 sigur Rússa á Marokkó í vináttulandsleik í gær.

Shirokov, sem verður 33 ára í byrjun júlí, hefur leikið 41 landsleik fyrir Rússland og skorað 11 mörk. Hann lék sem lánsmaður með Ragnari Sigurðssyni og félögum hjá FC Krasnodar á seinni hluta tímabilsins sem leið.

Pavel Mogilevets, miðjumaður Rubin Kazan, kemur inn í rússneska hópinn í stað Shirokovs.

Rússar, undir stjórn Fabios Capello, hefja leik á HM gegn S-Kóreu þann 17. júní.