Messi skoraði í sigri | Risahögl í Brüssel

Liðin sem taka þátt á HM í Brasilíu eru nú óða önn að undirbúa sig fyrir komandi átök, en margir vináttulandsleikir hafa farið fram á undanförnum dögum.

Mörk frá Ricardo Álvarez og Lionel Messi tryggðu Argentínu sigur á Slóveníu í kvöld, í síðasta leik liðsins fyrir HM.

Álvarez, sem leikur með Internazionale á Ítalíu, kom Argentínumönnum yfir á 12 mínútu og Messi gulltryggði svo sigurinn á þeirri 76. eftir að hafa komið inn á sem varamaður eftir um klukkustundar leik.

Heimsmeistarar Spánverja unnu 2-0 sigur á El Salvador í leik sem fór fram í Maryland í Bandaríkjunum. David Villa skoraði bæði mörkin, það fyrra á 60. mínútu og hið síðara tveimur mínútum fyrir leikslok.

Þá bar Belgía sigurorð af Túnis í vináttulandsleik sem var leikinn í Brüssel. Dries Mertens skoraði eina mark leiksins á 89. mínútu eftir sendingu frá Nacer Chadli, leikmanni Tottenham.

Leikurinn tafðist um tæpan klukkutíma, en dómarinn Viktor Kassai stöðvaði leikinn eftir 23 mínútur vegna hagléls sem rigndi niður. Eins og sjá má á myndunum hér að neðan voru höglin risastór og minntu helst á golfkúlur.