Eiga ekki möguleika í Brasilíu

Mario Balotelli, leikmaður AC Milan og ítalska landsliðsins, afskrifar Englendinga sem eitt af liðunum sem gæti unnið Heimsmeistaramótið sem fer fram í Brasilíu í sumar.

Balotelli sem lék með Manchester City um tíma er litríkur karakter og komst oft á forsíður fjölmiðla á Englandi fyrir allt annað en fótbolta. Kviknaði í húsi hans stuttu fyrir borgarslaginn í Manchester eftir að hann hafði verið að fikta með flugelda inn á baðherbergi.

Ítalir mæta Englendingum í fyrsta leik liðanna á mótinu 14. júní næstkomandi og er Balotelli byrjaður að skjóta á Englendinga.

"Það eru góðir leikmenn í enska liðinu en ekki nægilega góðir til að vinna mótið. Það eru 2-3 leikmenn í liðinu sem gætu strítt okkur í fyrsta leiknum en við verðum vel undirbúnir og ætlum okkur sigur."

"Í leikmannahópnum okkar eru leikmenn sem hafa unnið mótið, það er enginn í enska liðinu sem hefur komist lengra en átta liða úrslitin. Það skilur liðin að, það er önnur stemming og reynsla í hópnum hjá okkur," sagði Balotelli.