Ribery missir ekki af HM

Noel Le Graet forseti franska knattspyrnusambandsins segir engar líkur á því að Franck Ribery missi af heimsmeistarakeppninni í Brasilíu í sumar.

Ribery lék ekki með Frökkum þegar liðið lagði Noreg 4-0 í vikunni og verður ekki með liðinu á morgun gegn Paragvæ vegna meiðsla í baki.

Ribery fór í rannsókn vegna meiðslanna í dag og voru niðurstöðurnar jákvæðar fyrir Frakkann og landsliðið.

„Niðurstöður rannsóknanna sýndu að það eru engar líkur á því að hann missi af keppninni,“ sagði Le Graet við fjölmiðla í dag.

„Hann hafði smá áhyggjur vegna sársauka í neðra baki en þetta er ekki alvarlegt. Hann byrjar aftur að æfa í næstu viku.“