Silva vill Brasilíu og Frakkland í úrslitum

Thiago Silva fyrirliði brasilíska landsliðsins í fótbolta vonast eftir því að mæta Frakklandi í úrslitaleik heimsmeistarakeppninnar í Brasilíu í sumar.

Silva leikur með Frakklandsmeisturum PSG og var spurður út í drauma sína fyrir HM í sumar og allt sem hann vill er að Brasilía komist í úrslitin en helst vill hann mæta Frökkum þar.

Brasilía hefur fimm sinnum orðið heimsmeistari, oftast allra þjóða, en liðinu mistókst að vinna í fyrra skiptið sem þjóðin hélt mótið, árið 1950.

Brasilía þykir alltaf líkleg til afreka á HM og ekki síður núna þar sem liðið er á heimavelli.

„Minn æðsti draumur? Brasilía í úrslitum, sama gegn hverjum,“ sagði Silva.

„Úrslitaleikurinn gæti verið Brasilía gegn Spáni, endurtekning á Álfukeppninni í fyrra þegar við unnum 3-0.

„Eða Brasilía – Þýskalandi eða við gegn Ítalíu. En þar sem ég leik í Frakklandi þá myndi ég vilja leika gegn þeim.

„Það væri frábært að fá tækifæri til að hefna fyrir tapið í úrslitunum 1998.

„Það var hrikalegt tap og mikil vonbrigði fyrir okkur. Vonbrigðin lifa í minningu allra frá Brasilíu,“ sagði Silva.