Ekki hrædd við að þjálfa karla

Engin kona hefur tekið að sér stærra starf í karlaboltanum en Helena Costa. Hún segist hvergi vera banginn.

Þessi 36 ára gamla portúgalska kona er orðinn þjálfari hjá franska 2. deildarfélaginu Clermont Foot. Hún var áður njósnari hjá Celtic í Skotlandi.

"Ég er ekki hrædd. Ef ég teldi mig ekki ráða við starfið þá væri ég ekki hérna," sagði Costa á blaðamannafundi í gær en yfir 100 blaðamenn mættu á fundinn.

"Ef ég hefði ekki trú á því að leikmenn myndu ekki taka á móti mér með opnum örmum og ef ég tryði ekki á mína vinna þá væri ég ekki hérna."

Costa hefur þjálfað lengi og var eitt sinn þjálfari unglingaliðs Benfica í karlaflokki. Hún var einnig þjálfari katarska kvennalandsliðsins.

"Ég veit að þetta er stórt skref en það er árið 2014 núna. Ég skil vel að margir séu hissa á þessari ráðningu en það á ekki að vera neitt óeðlilegt við þetta. Það á að líta á mig eins og hvern annan fótboltaþjálfara."