Eiður og félagar fóru illa að ráði sínu

Eiður Smári Guðjohnsen og félagar hans Club Brugge töpuðu nokkuð óvænt á útivelli fyrir Genk, 3-2, í næstsíðustu umferð meistaraumspilsins í belgísku úrvalsdeildinni í fótbolta í kvöld.

Heimamenn komust í 1-0 og 2-1 en Club Brugge jafnaði í bæði skiptin. Pólverjinn Waldemar Sobota jafnaði metin í 2-2 á 72. mínútu.

Eiður Smári spilaði síðustu 25 mínúturnar fyrir Club Brugge sem fékk á sig sigurmark á 83. mínútu en það skoraði Ilombé Mboyo fyrir heimamenn. Lokatölur, 3-2.

Á sama tíma vann efsta lið meistaraumspilsins, Anderlecht, 2-1 útisigur á Ólafi IngaSkúlasyni og félögum hans í Zulte-Waragem. Ólafur Ingi var í byrjunarliðinu en var tekinn af velli í hálfleik.

Anderlecht og Club Brugge voru jöfn á toppnum með 45 stig fyrir leikina í kvöld en nú munar þremur stigum á liðunum. Standard Liege komst upp í annað sætið með 46 stig í kvöld en það vann Lokeren, 3-1.

Anderlecht á nú titilinn vísan en það þarf líklega aðeins eitt stig í lokaumferðinni á móti Lokeren á heimavelli á sunnudaginn.