Jóhann Berg kvaddi með "selfie"

Jóhann Berg Guðmundsson, landsliðsmaður í fótbolta, spilaði síðasta leik sinn fyrir hollenska liðið AZ Alkmaar í dag.

Því miður var það tapleikur í Evrópudeildarumspili gegn Groningen sem þýðir að AZ-liðið verður ekki í Evrópukeppni á næsta ári.

Jóhann Berg spilaði allan leikinn líkt og AronJóhannsson, markahrókurinn úr Grafarvoginum.

Vængmaðurinn öflugi gaf það út fyrir nokkru að hann ætlar sér að yfirgefa félagið í sumar og finna sér nýtt lið en hann hefur verið í herbúðum AZ í fimm og hálft ár, eða síðan hann gekk í raðir þess frá Breiðabliki.

Jóhann á að baki 200 leiki fyrir AZ og hefur skorað í þeim 34 mörk. Hann vann hollenska bikarinn með liðinu á síðustu leiktíð.

Jóhann tók „selfie“ með AroniJóhannssyni, sænska bakverðinum MatthiasJohansson og danska miðjumanninum MarkusHenriksen eftir leik.

„Mjög leiður yfir því að vera að yfirgefa AZ Alkmaar eftir frábær fimm og hálft ár hjá félaginu,“ skrifaði Jóhann við myndina sem birtist á Facebook-síðu hans.

Ekki er vitað hvað tekur við hjá Jóhanni Berg en hann var eftirsóttur af liðum á Englandi á sínum tíma.