Eiður vill spila áfram

Eiður Smári Guðjohnsen segist vera reiðubúinn að spila áfram en ljóst er að hann verður ekki áfram í herbúðum Club Brugge í Belgíu.

Þetta sagði hann í samtali við Morgunblaðið í dag en um helgina skoraði hann annað marka liðsins í 2-0 sigri á Zulte Waregem.

Hann sagði óljóst hvað taki við hjá sér en hann ætlar fyrst um sinn að verja tíma með fjölskyldu sinni sem er enn búsett á Spáni.

„Þetta er bara mjög óljóst og ég er bara í stakk búinn að spila áfram. Ég hef ekkert meiðst í langan tíma og ég er í betra formi núna en ég hef verið í mörg ár,“ sagði Eiður Smári.

„Kannski tekst ég á við eitthvert nýtt ævintýri. En ef það kemur ekkert slíkt upp, þá sé ég bara til.“

Eiður Smári segist enn fremur hafa rætt mikið við Lars Lagerbäck, annan landsliðsþjálfara Íslands, um framtíðina með landsliðinu.

„Við höfum ákveðið að hafa þetta bara opið. Eins og staðan er í dag þá útiloka ég ekkert að spila fleiri landsleiki. En kannski breytist það eitthvað í vor eða sumar.“