Van Gaal tekur við Manchester United

Louis van Gaal hefur verið ráðinn knattspyrnustjóri Manchester United til næstu þriggja ára. Þetta staðfesti Manchester United í dag.

Þetta hefur legið í loftinu síðustu daga og vikur en David Moyes var rekinn á miðju tímabili eftir að ljóst varð að United myndi ekki spila í Meistaradeild Evrópu á næstu leiktíð.

Van Gaal er 62 ára gamall og stýrir landsliði Hollands á HM í Brasilíu í sumar. Að mótinu loknu kemur hann til starfa á Old Trafford.

„Það var alltaf mín ósk að starfa í ensku úrvalsdeildinni og ég er mjög stoltur af því að starfa sem knattspyrnustjóri Manchester United, stærsta félag heims,“ sagði van Gaal í viðtali á heimasíðu United.

„Ég hef stýrt liðum á stórum leikjum á Old Trafford áður og þekki vel hversu magnaður leikvangur það er. Þetta er metnaðarfullt félag en það er ég líka. Ég er þess fullviss að við munum ná sögulegum árangri saman.“

Ryan Giggs, sem stýrði United tímabundið eftir að Moyes var látinn fara, hefur verið ráðinn aðstoðarstjóri van Gaal en í þjálfarateyminu verða einnig Hollendingarnir Frank Hoek og Marcel Bout.

„Ég er hæstánægður með að fá tækifæri til að starfa sem aðstoðarstjóri. Louis van Gaal er þjálfari í heimsklassa og ég veit að ég mun læra heilmikið af honum,“ sagði Giggs. „Manchester United hefur verið stór hluti af mínu lífi og ég er glaður að vera hér áfram í svo mikilvægu hlutverki.“

Van Gaal er margreyndur þjálfari sem hefur unnið meistaratitla í Hollandi, Spáni og Þýskalandi sem og Meistaradeild Evrópu og gömlu UEFA-bikarkeppnina.

CONFIRMED: Louis van Gaal will become #mufc manager after the World Cup. More: http://t.co/YBjnDdcRQI #vangaalmufc pic.twitter.com/RNjAbbvwVx

— Manchester United (@ManUtd) May 19, 2014