Alfreð spilaði líklega sinn síðasta leik fyrir Heerenveen í gær

Alfreð Finnbogason, framherji Heerenveen í Hollandi, verður ekki meira með liðinu á tímabilinu en hann meiddist þegar Heerenveen tapaði fyrir AZ Alkmaar, 3-0, í Evrópudeildarumspilinu í gærkvöldi.

Alfreð staðfestir við 433.is í dag að hann hafi lokið keppni á tímabilinu en einnig eru litlar líkur á að hann verði með Íslandi í landsleikjunum á móti Austurríki og Eistlandi um mánaðarmótin.

Íslenski landsliðsframherjinn hefur líklega leikið sinn síðasta leik með Heerenveen en hann flytur sig væntanlega um set í sumar. Mörg lið hafa áhuga á honum en Alfreð endaði sem markahæsti leikmaður hollensku deildarinnar með 29 mörk.

Enska liðið Fulham reyndi að kaupa hann fyrir 10 milljónir punda á lokadegi félagaskipta í janúar en Heerenveen hafnaði tilboðinu við litla hrifningu Alfreðs sem hefur gefið það út að hann vill taka næsta skref á ferlinum í sumar.

Alfreð er markahæsti leikmaður Heereveen í hollensku deildinni í sögu félagsins.