Alríkislögreglan í Brasilíu hótar verkfalli á meðan HM stendur yfir

Alríkislögreglan í Brasilíu fór í verkfall í gær vegna launamála og hún hótar að gera slíkt hið sama á meðan heimsmeistarakeppnin í fótbolta stendur yfir þar í landi í næsta mánuði.

Talsmaður þeirra sem fóru í verkfall segir í samtali við BBC að a.m.k. 40 prósent alríkislögreglumanna í landinu hafi tekið þátt í mótmælunum.

Starfsmenn alríkislögreglunnar gengu út af skrifstofum sínum og lögðu niður vinnu í gær um alla Brasilíu, þar á meðal í borgum sem hýsa HM-leiki í næsta mánuði.

Svipað verkfall lögreglunnar í síðasta mánuði varð til þess að fólk lét öllum illum látum á götum Bahia og þurfti ríkið því að senda út herinn til að taka á málunum.

Um 50 lögreglumenn sem mótmæltu í Ríó voru með klúta yfir andlitum sínum og voru í bolum sem á stóð: „Hjálpið alríkislögreglunni.“

Heimsmeistarakeppnin fer fram í tólf borgum Brasilíu og hefst 12. júní.