Guðlaugur Victor og félagar nældu í stig

Guðlaugur Victor Pálsson og félagar í NEC Nijmegen í slæmum málum eftir jafntefli gegn AZ Alkmaar í hollensku úrvalsdeildinni í dag. NEC þarf líklegast að spila umspilsleik upp á sæti sitt í úrvalsdeildinni á næsta ári.

Aðeins einn sigur í síðustu tólf leikjum gerir það að verkum að liðið hefur sogast inn í fallbaráttuna þegar tveir leikir eru eftir af deildarkeppninni. Roda JC sem situr í botnsætinu gæti enn náð NEC að stigum en þremur stigum munar á liðunum.

Aron Jóhannsson var í byrjunarliði AZ Alkmaar en náði ekki að setja mark sitt á leikinn frekar en Jóhann Berg Guðmundsson sem kom inn af varamannabekknum og spilaði síðustu tíu mínútur leiksins. Guðlaugur Victor var í byrjunarliði NEC og spilaði allan leikinn ásamt því að næla sér í gult spjald.