Celtic tryggði sér meistaratitilinn

Það er ekki bara Bayern München sem hefur einstaka yfirburði í sínu heimalandi því sama staða er í Skotlandi þar sem Celtic er í sérflokki.

Celtic tryggði sér sinn þriðja meistaratitil í röð í kvöld er liðið vann 1-5 útisigur á Partick Thistle.

Skoska deildin hefur ekki klárast svona snemma síðan 1929. Það er ansi drjúgur tími en þá vann Rangers deildina þann 16. mars. Það met stendur því enn.

Celtic er með 26 stiga forskot í deildinni og það dugar fyrir 45. meistaratitlinum. Hólmbert Aron Friðjónsson var ekki í leikmannahópi Celtic í kvöld.