Standa fyrir vísindadegi

Föstudaginn 14. mars gangast Orkuveita Reykjavíkur og Orka náttúrunnar fyrir vísindadegi, þar sem kynntar verða niðurstöður 18 rannsókna sem færir vísindamenn hafa unnið í samstarfi við fyrirtækin.

Þetta kemur fram í fréttatilkynningu frá Orkuveitu Reykjavíkur.

Jarðhitanýting hér á landi og áhrif hennar eru í brennisdepli. Áberandi í dagskránni eru rannsóknir á brennisteinsvetni frá jarðvarmavirkjunum, útbreiðslu þess og áhrifum en á næstu vikum verður gangsett gasskiljustöð við Hellisheiðarvirkjun sem hefur það hlutverk að draga úr umhverfisáhrifum jarðhitanýtingarinnar.

Vísindadagurinn verður að Bæjarhálsi 1, stendur frá 9-15:40 og aðgangur er ókeypis.

Fimmtán erindi og kynningar að auki

Umhverfisrannsóknir eru fyrirferðarmestar á Vísindadeginum enda hafa áhrif jarðhitanýtingar á náttúru, samfélag og jarðhitaforðann verið mjög í deiglu síðustu misseri. Rannsóknirnar ná ekki eingöngu til virkjanasvæða heldur líka til jarðhitaforða hitaveitna.

Langstærsti hluti jarðhitanýtingar hér á landi er til húshitunar og mikilvægt að gætt sé að því að framleiðsla ýmissa smærri hitaveitna sé í takti við afköst jarðhitasvæðanna sem þær nýta. Tvö erindi á Vísindadeginum snúa að jarðskjálftavirkni í tengslum við niðurdælingu vinnsluvatns frá Hellisheiðarvirkjun.

Flóð í miðbænum?

Sagan geymir frásagnir af sjávarflóðum í Reykjavík, ólíkt tröllslegri en þeim sem sletta þangi og grjóti yfir Ánanaustin öðru hverju. Eitt erindanna fjallar um hvernig við erum í stakk búin að bregðast við svoleiðis hamförum og hvaða áhrif flóð af þessu tagi gætu haft í Kvosinni, þar sem byggð stendur einna lægst í höfuðborginni.

Anna Heiður Eydísardóttir, verkfræðingur á Eflu verkfræðistofu, hefur verið að kanna þessi mál og hvernig megi verjast stórfelldu tjóni. Hún flytur erindi á Vísindadeginum.