Framsókn í Kópavogi vill þjóðaratkvæðagreiðslu

Ómar Stefánsson bæjarfulltrúi og oddviti Framsóknarflokks í Kópavogi, leggst gegn ESB-tillögu Gunnars Braga Sveinssonar utanríkisráðherra og vill að Kópavogsbær samþykki áskorun á Alþingi. Forseti bæjarstjórnar tók undir. Þetta kom fram á bæjarráðsfundi Kópavogs í gær.

Tillaga Ómars er svohljóðandi: „Bæjarráð skorar á Alþingi að draga til baka tillögu til þingsályktunar um að draga til baka umsókn Íslands um aðild að Evrópusambandinu og um eflingu samstarfs við Evrópusambandið og Evrópuríki, og setja málið í þjóðaratkvæðagreiðslu.

Með því mun: „ríkisstjórnin leitast við að virkja samtakamátt þjóðarinnar og vinna gegn því sundurlyndi og tortryggni sem einkennt hefur íslensk stjórnmál og umræðu í samfélaginu um nokkurt skeið. Framfarir og bætt lífskjör á Íslandi hafa byggst á samvinnu og samheldni og til framtíðar munu Íslendingar halda áfram að leysa sameiginlega af hendi helstu verkefni þjóðfélagsins“.

Undir ritar Ómar Stefánsson. Pétur Ólafsson Samfylkingu lagði fram eftirfarandi bókun: „Ég fagna tillögu fulltrúa Framsóknarflokksins.“ Og Rannveig Ásgeirsdóttir frá Kópavogslista og forseti bæjarstjórnar tekur undir tillögu Ómars Stefánssonar. Bæjarráð vísar tillögunni til afgreiðslu bæjarstjórnar.