Falcao þarf í aðgerð og missir líklega af HM

Franska félagið AS Monaco staðfesti í dag að sóknarmaðurinn Radamel Falcao, leikmaður kólumbíska landsliðsins, þurfi að fara í aðgerð vegna krossbandsmeiðsla í hné.

„Radamel Falcao hlaut meiðsli á krossbandi á vinstra hné. Aðgerð er óumflýjanleg,“ segir í yfirlýsingunni. „Læknarnir munu gera allt sem hægt er svo hann geti jafnað sig eins fljótt og mögulegt er.“

Ekki hefur því fengist enn staðfest hvort að Falcao sé hreinlega með slitið krossband en í slíku tilfelli væri fullvíst að hann myndi ekki ná sér fyrir HM í Brasilíu í sumar.

Falcao var borinn af velli þegar að Monaco vann 3-0 sigur á áhugamannaliðinu Chasselay í 32-liða úrslitum frönsku bikarkeppninnar í gærkvöldi.

Kólumbía náðu öðru sæti í undankeppni HM 2014 í Suður-Ameríku og var Falcao lykilmaður í liðinu.