Blanc kennir vellinum um töpuð stig

Laurent Blanc þjálfari franska stórliðsins Paris Saint-Germain var allt annað en sáttur við grasið á Stade du Roudourou vellinum í gær þegar PSG náði aðeins 1-1 jafntefli gegn Guingamp á útivelli.

Skallamark Alex undir lok leiksins tryggði PSG stig eftir að MustaphaYatabare frá Malí kom Guingamp yfir.

Blanc sagði frönsku meistarana hafa leikið undir getu en hann hafði sitt að segja um völlinn í Brittany.

„Það er alltaf erfitt að vinna leiki. Við komum hingað til að vinna þó við berum mikla virðingu fyrir Guingamp,“ sagði Blanc. „Ef við vorum þreytulegir, hvað var þá Guingamp?

„Við vorum meira með boltann og þeir biðu bara eftir okkur. Þetta voru vonbrigði en ég er ánægður með að við gáfumst aldrei upp og komum til baka og náðum í stigið sem við áttum skilið.

„Af hverju vorum við ekki eins góðir og venjulega. Ég vil ekki afsaka mig en gæði vallarins voru ekki boðleg. Hann var vissulega slæmur fyrir bæði lið en þetta bitnaði meira á liðinu sem reynir að spila fótbolta,“ sagði Laurent Blanc.