Hættustig á Ísafirði vegna snjóflóðahættu

Enn er í gildi óvissustig vegna snjóflóða á norðanverðum Vestfjörðum, ennfremur hefur snjóflóðavakt Veðurstofu Íslands lýst yfir hættustigi á Ísafirði og hefur verið ákveðið að rýma reit 9.

Engin búseta er á reitnum en á honum er atvinnuhúsnæði.

Nokkur stór snjóflóð hafa fallið undanfarna tvo daga og úrkoma er nú töluverð og gæti varað næsta sólarhringinn. Samkvæmt Veðurstofu Íslands er í kvöld og nótt spáð vaxandi norðlægum vindi.

Mikill snjór er til fjalla víða á norðan- og austanverðu landinu en þar er ekki talin hætta í byggð eins og er. Ferðafólki í fjalllendi er bent á að fara varlega.