Seldist upp á 25 mínútum

Uppselt er á eina vinsælustu tónlistarhátíð heims, Glastonbury, en miðarnir fóru í sölu í morgun og seldust upp á tuttugu og fimm mínútum.

Þó er ekki enn orðið ljóst hver stærstu nöfn hátíðarinnar verða, en líklegast þykir að hljómsveitin Fleetwood Mac muni verða ein þeirra. Önnur bönd sem sögð eru vera líkleg eru meðal annarra eftirlifandi meðlimir Queen með Adam Lambert sem söngvara, Foo Fighters, Daft Punk eða Radiohead. Hátíðin verður haldin dagana 24.-28.júní eins og nafnið gefur til kynna í Glastonbury á Englandi.

Ekki er þó öll von úti enn um að verða sér út um miða, en einhverjir miðar verða seldir í vor.