Verðum að stöðva Pirlo

Roy Hodgson, þjálfari enska landsliðsins, telur að liðinu muni takast betur að stöðva Andrea Pirlo, miðjumann ítalska liðsins, heldur en þegar liðin mættust á Evrópumótinu árið 2012.

England datt út í átta liða úrslitum Evrópumótsins gegn Ítölum eftir vítaspyrnukeppni fyrir tveimur árum. Enska liðinu gekk illa að ráða við Pirlo í leiknum sem stjórnaði öllu miðjuspili ítalska liðsins.

„Til að byrja með þurfum við að spila betur. Það má ekki gefa Pirlo neitt, hann er mjög góður fótboltamaður sem nýtti sér þreytu í liði andstæðinganna. Það verða allir með ferska fætur og vonandi tekst okkur að loka á hann í fyrsta leik mótsins,“ sagði Hodgson.