Pele hefur trú á enska liðinu

Brasilíska goðsögnin Pele hefur fulla trú á því að enska landsliðið muni komast upp úr riðli sínum á Heimsmeistaramótinu sem hefst í Brasilíu á fimmtudaginn.

Pele gerði lítið úr efasemdum um hinn hvíta Pele, Wayne Rooney, sem hefur fengið sinn skerf af gagnrýni undanfarnar vikur.

England er í erfiðum riðli með Ítalíu, Úrúgvæ og Kosta Ríka og verður því eitt stórlið sem dettur út í riðlakeppninni. Pele telur hinsvegar að Rooney muni skjóta Englandi upp úr riðlinum.

„England er í erfiðum riðli en ég held að þeir muni komast í gegn, þetta verður mjög jafn riðill. Rooney hefur ekki enn skorað á lokakeppni Heimsmeistaramótsins en hann er mikilvægur enska liðinu. Hann er leikmaður sem gefur sig allan fyrir liðið og ég mundi vilja hafa hann í mínu liði,“ sagði Pele.