Biður um gott veður fram í maí

Arsene Wenger, stjóri Arsenal, er bjartsýnn maður. Hann hefur beðið fjölmiðla um að bíða fram í maí með að dæma liðið.

Það hefur ekki gengið sem skildi hjá Arsenal í vetur og liðið tapaði gegn Stoke um síðustu helgi. Liðið er þó komið áfram í Meistaradeildinni enn eitt árið.

„Við viljum vera dæmdir í lok tímabilsins en ekki eftir hvern leik. Við eigum eftir að ná stöðugleika í varnarleiknum og við skulum svo sjá hvar við endum í lok tímabilsins," sagði Wenger.

Stjórinn hefur sjálfur verið harkalega gagnrýndur í vetur og stuðningsmenn eru farnir að mæta með borða á völlinn þar sem þess er óskað að hann láti sig hverfa frá félaginu.

„Maður verður að lifa við svona gagnrýni. Við erum atvinnumenn og þetta er hluti af starfinu."