Líbía hættir við að halda Afríkukeppnina

Afríkukeppnin landsliða í fótbolta 2017 verður ekki haldin í Líbíu eins og til stóð. Þetta er í annað sinn á þremur árum sem Líbía hættir við að halda keppnina vegna ástandsins í landinu.

Líbía átti upphaflega að halda keppnina 2013 en hætt var við það árið 2011 og keppnin í staðin haldin í Suður-Afríku. Nú þremur árum síðar þarf þjóðin aftur að hætta við þar sem ekki þykir öruggt að halda keppni sem þessa í landinu.

Suður-Afríka átti upphaflega að halda keppnina 2017 en skipti við Líbíu. Knattspyrnusamband Afríku á eftir að finna út úr því hvaða þjóð mun fylla í skarðið fyrir Líbíu í þetta skiptið.

Opið er fyrir umsóknir Afríkuríkja að sækja um að halda keppnina til 30. september 2014 sagði í tilkynningu frá knattspyrnusambandi Afríku. Ákvörðunin verður þó ekki tilkynnt fyrr en á næsta ári.