Stafur Kim ætlaður sem tákn um visku

Nýr göngustafur Kim Jong-un, leiðtoga Norður-Kóreu, er ekki einungis á góðri leið með að verða eitt mest umtalaða stoðtæki í heimi alþjóðastjórnmála heldur einnig aðferð Kims til að snúa einum af veikleika sínum í styrkleika.

Þetta segir John Delury, sérfræðingur í málefnum Norður-Kóreu og prófessor við Yonsei-háskóla í Seúl.

„Þrátt fyrir að stafurinn sé merki um hrakandi heilsu Kims – hann kom nýverið fram í fyrsta sinn í fjörutíu daga eftir miklar vangaveltur um hvað hafi komið fyrir hann – þá er þetta jafnframt tákn um visku og aldur,“ segir Delury í samtali við Wall Street Journal.

Þegar Kim tók við leiðtogaembættinu í Norður-Kóreu að föður sínum látnum árið 2011, var reynt að leggja áherslu á ungan aldur Kims sem merki um kraft og þrótt.

„Nú standa þeir frammi fyrir því vandamáli að vera með rúmlega þrítugan mann sem á í raun ekki að haltra,“ segir Delury. „Þeir reyna að lagfæra það með því að segja að hann þjáist fyrir þjóð sína en einnig að hann hafi þroskast.“