Costa klár í slaginn

Diego Costa, framherji Atletico Madrid og spænska landsliðsins, er kominn aftur á stað stuttu fyrir Heimsmeistaramótið. Costa hefur glímt við meiðsli aftan í læri undanfarnar vikur.

Costa fór meiddur af velli í lokaleik spænsku úrvalsdeildarinnar og aftur viku seinna í úrslitaleik Meistaradeildarinnar. Tefldi Costa ansi djarft með því að spila þrátt fyrir meiðslin í úrslitaleiknum og entist hann fyrir vikið í aðeins nokkrar mínútur.

Costa valdi að spila fyrir spænska landsliðið þrátt fyrir að vera frá Brasilíu og verður athyglisvert að sjá hvernig heimamenn taka á móti Costa. Costa lék tvo æfingarleiki fyrir Brasilíu áður en hann skipti um landslið.

Costa var valinn í 23-manna lokahóp Spánverja og lék 73 mínútur í seinasta vináttuleik Spánverja fyrir mótið gegn El Salvador.

„Ég þurfti leikinn gegn El Salvador. Mér líður vel og það verða engin vandamál að ég tel. Hlutirnir hafa gengið vel hingað til og strákarnir hafa tekið vel á móti mér,“ sagði Costa.

Costa hefur verið orðaður við Chelsea undanfarnar vikur og er talið að hann muni ganga til liðs við Lundúnarklúbbinn á næstu dögum.