Bayern sendi foreldrunum reikninginn

Bayern München hefur sent foreldrum þeirra drengja sem báru ábyrgð á frægum borða á leik liðsins gegn Arsenal rukkun.

Umræddur borði var í stúkunni í leik Bayern og Arsenal í Meistaradeild Evrópu og gerði lítið úr samkynhneigðum.

Knattspyrnusamband Evrópu, UEFA, sektaði Bayern um 10 þúsund evrur vegna málsins og lét félagið loka einu hólfi í stúkunni á Allianz Arena í leik liðsins gegn Manchester United í fjórðungsúrslitum Meistaradeildar Evrópu.

Bayern á vitaskuld ekki í vandræðum með að greiða umrædda sekt en foreldrar þeirra fjögurra drengja sem komu með borðann á leikinn hafa samþykkt að greiða tvö þúsund evrur hvert.

Þó er talið að heildarkostnaður Bayern vegna málsins nemi um 150 þúsund evrum - um 23 milljónum króna.