"Ég gerði þetta til að vernda fjölskyldu mína“

„Ég myndi gera þetta aftur til að vernda móður mína og systur.“ Þetta segir spænsk stúlka sem hlaut árs fangelsisdóm fyrir fíkniefnasmygl sem hún var neydd til að taka þátt í. Héraðsdómur taldi sögu hennar trúverðuga en ákvað engu að síður að læsa stúlkuna á bak við lás og slá. 

Stúlkan er 21 árs gömul og kom til landsins í október síðastliðnum frá Spáni. Tollverðir stöðvuðu hana og ljós kom að hún var með rétt rúmlega 420 grömm af kókaíni innvortis.

Þessi efni voru ætluð til sölu hér á landi en götuvirði þeirra nemur rúmlega 630 þúsund krónum. Stúlkan var ákærð og játaði brot sitt skýlaust fyrir dómi. Hún fullyrti að hafa verið burðardýr, neydd til að fara þessa ferð til Íslands af tveimur mönnum sem hótuðu að misþyrma fjölskyldu hennar.

Hún sagði að mennirnir hefðu komið pakkningum fyrir í leggöngum hennar. Þegar komið var til landsins þurfti að svæfa stúlkuna svo hægt væri að sækja efnin.

Í dómsorði segir að saga stúlkunnar sé trúverðug. Þetta, ásamt játningu hennar, varð til refsilækkunar. Héraðsómur Reykjaness dæmdi stúlkuna þó í eins árs fangelsi og vísaði sér til rökstuðnings í styrkleika efnanna.

Hún hefur blendnar tilfinningar til niðurstöðunnar.

„Þetta var bæði gott og slæmt. Af því að tíminn er stuttur og ég er hér á öruggum stað. Það slæma er auðvitað að þetta er fangelsi en það góða er öryggið. Það mun ekkert koma fyrir mig hér. En ég sakna auðvitað fjölskyldu minnar.“

Hún fór fram á að nafn hennar yrði ekki birt enda óttast hún um öryggi sitt og fjölskyldu sinnar ytra. Hún segir þessa lífsreynslu hafa verið hrikalega, engu að síður hafi móðir hennar og systir þurft að hafa forgang.

„Málið er að maður getur ekki vitað hvernig maður bregst við í þessari aðstöðu fyrr en á reynir. Í mínu tilviki þá gerði ég þetta til að vernda fjölskyldu mína.“

„Í öðru lífi hefði ég ekki breytt neinu. Þetta er fjölskylda mín. Systir mín og mamma. Þetta var annað hvort þær eða ég.“