Mætti ölvaður og skilaði bílaleigubíl

Erlendur ferðamaður, er kom til að skila bifreið til bílaleigu á Keflavíkurflugvelli um helgina, reyndist vera vel slompaður undir stýri.

Var hann jafnframt með koníaksflösku í bílnum. Starfsmenn bílaleigunnar kölluðu lögregluna á Suðurnesjum  á vettvang, en þegar lögreglumenn bar að tók ferðamaðurinn á sprett og lét sig hverfa. Hann var handtekinn skömmu síðar.

Á lögreglustöð neitaði maðurinn að hafa ekið, en kvað ónefndan ferðafélaga sinn hafa verið undir stýri.  Hann hefði einungis sest í sæti ökumanns til þess að slökkva á bifreiðinni. Félaginn ætti einnig flöskuna. Sagði hann þá tvo eiga að mæta í flug til Berlínar á næstu mínútum.

Þegar maðurinn var spurður hvers vegna hann hefði tekið til fótanna þegar hann sá lögreglu, kvaðst hann hafa verið að hlaupa í átt að flugstöðinni til að láta vita að hann og ferðafélagi sinn væru rétt ókomnir.  Maðurinn missti af fluginu, en var látinn laus að loknum skýrslu,- og sýnatökum.