Verstu flóðin í Kasmír-héraði í áraraðir

Að minnsta kosti átján eru látnir og þurft hefur að loka skólum og leggja niður lestarferðir í Kasmír-héraði vegna mestu flóða á svæðinu í 22 ár. Um fimmtíu manns er nú saknað eftir að rúta á leið úr brúðkaupi skolaðist burt í indverska hluta héraðsins í gær.

Í samtali við fréttaveituna AP segir Rajesh Kumar, lögreglustjóri á svæðinu, það hafa tekist að bjarga þremur farþegum sem sluppu úr bifreiðinni. Rútan sjálf er hins vegar enn ekki fundin og óvíst um afdrif hinna farþeganna. Regn og aurskriður hindra aðgengi að svæðinu þar sem rútan týndist.

Öflug skyndiflóð herja á um hundrað þorp í Kasmír þar sem gríðarmikil rigning hefur valdið því að ár flæða yfir bakka sína. Veðurfræðingar segja líklegt að áfram muni rigna næstu tvo daga eða svo.

Aurskriður og flóð eru nokkuð algeng í Indlandi á rigningartímabilinu, sem nær frá júní og út september.