NATO sendir skýr skilaboð til Moskvu

Leiðtogar Atlantshafsbandalagsins samþykktu í dag stofnun viðbragðssveitar sem getur brugðist við óvæntum átökum með skömmum fyrirvara. Fráfarandi framkvæmdastjóri NATO segir þessa ákvörðun senda Rússum skýr skilaboð en áhersla verður einnig lögð á aukinn sýnileika bandalagsins í austur Evrópu.

Svar Atlantshafsbandalagsins við útþenslustefnu Rússlands í Úkraínu, með innlimun Krímskaga og hernaðarlegum stuðningi við aðskilnaðarsinna í austurhluta landsins, birtist að loknum leiðtogafundi NATO í Wales í dag.

„Í dag ákváðum við að stofna það sem ég vil kalla örvarodd innan viðbragðssveita okkar. Hersveit sem brugðist getur skjótt við og með skömmum fyrirvara. Þessi viðbragðssveit verður skipuð nokkur þúsund hermönnum sem geta brugðist við í lofti, á sjó og með sérsveitum á örfáuum dögum,“ sagði Anders Fogh Rasmussen fráfarandi framkvæmdastjóri NATO að loknum leiðtogafundinum í dag.

Þá tilkynnti forseti Póllands stoltur að næsti leiðtogafundur NATO verði í Varsjá höfuðborg Póllands árið 2016, í sömu borg og Varsjárbandalag Sovétríkjanna og leppríkja þeirra var stofnað á sínum tíma.  En þar munu höfuðstöðvar hinna nýju viðbragðssveita verða.

David Cameron forsætisráðherra Bretlands segir nýju hersveitina verða hluta af endurskipulögðum viðbragðssveitum Atlantshafsbandalagsins með höfuðstöðvar í Póllandi. „Framvarðasveit í austurhluta bandalagsins, búin nauðsynlegum búnaði og skipulagi sem gefa kost á fleiri æfingum og skjótari viðbrögðum ef þörf á krefur,“ sagði Cameron.

„Þetta sendir skýr skilaboð til allra hugsanlegra árásaraðila;  að ef þeir svo mikið sem láta sér detta í hug að ráðast á eitt bandalagsríkjanna þá eigi þeir bandalaginu í heild sinni að mæta,“ sagði Rasmussen.

Hann segir þessa ákvörðun einnig senda skýr skilaboð til Moskvu.

„Í ljósi núverandi stöðu öryggismála er viðeigandi að fram komi að þessi viðbragðsáætlun felur einnig í sér aukinn sýnileika NATO í austri. Ég tel að það sendi mjög skýr skilaboð til Moskvu,“ sagði Anders Fogh Rasmussen.