Alfreð ósáttur með forráðamenn Heerenveen

Alfreð Finnbogason, leikmaður Heerenveen og íslenska landsliðsins er óánægður með forráðamenn Heerenveen eftir að liðið hafnaði tilboði frá Fulham í félagsskiptaglugganum.

Alfreð sem er markahæstur í hollensku úrvalsdeildinni hefur verið orðaður meðal annars við Roma, AC Milan, Everton og Fulham á tímabilinu. Talið er að Fulham hafi boðið tíu milljónir evra í Alfreð en stjórn Heerenveen hafnaði tilboðinu.

„Heerenveen sagði mér að þeir vildu fá tíu milljónir evra fyrir mig og þeir stóðu ekki við orðin sín, auðvitað er ég vonsvikinn að missa af tækifærinu að spila í ensku úrvalsdeildinni,“ sagði Alfreð í samtali við Omrop Friesland.

Rene Meulensteen, knattspyrnustjóri Fulham var duglegur á leikmannamarkaðnum í janúar, á lokadegi gluggans gengu Fulham frá kaupum á Konstantinos Mitroglou frá Olympiakos, Johnny Heitinga frá Everton, Larnell Cole og Ryan Tunnicliffe frá Manchester United ásamt því að fá Lewis Holtby á láni frá Tottenham.