Ein sigursælasta hjólreiðakona heims á Miðnæturmóti Alvogen

Hanka Kaupfernagel, sem er með sigursælari hjólreiðakonum heims, kemur hingað til lands og tekur þátt í Miðnæturtímatökumóti Alvogen sem fer fram á fimmtudagskvöld.

Hún hefur verið í fremstu röð frá árinu 1990 á að baki fjölmarga heims- og evrópumeistaratitla, ásamt því að hljóta silfurverðlaun á Ólympíuleikum. Þá mun Þjóðverjinn Richard Geng einnig keppa á mótinu en hann er fyrrum atvinnumaður í hjólreiðum og mjög sigursæll í íþróttinni. Öflugustu hjólreiðamenn og konur landsins hafa boðað komu sína á mótið sem haldið er í annað sinn.

Alvogen Midnight Time Trial er tileinkað réttindum barna og renna þátttökugjöld óskert til neyðarsöfnunar UNICEF til hjálpar börnum í Suður-Súdan. Rásmark er við Hörpu og þaðan er hjólað eftir Sæbraut að gatnamótum við Laugarnesveg og til baka að endamarki við Hörpu.  Snúið er við á keilum og keppnishringur er um 5,5 km langur.  Áhorfendamet var slegið þann 4. júlí 2013 þegar um 500 manns fylgdust með keppninni. Sæbrautinni verður lokað meðan á keppninni stendur.

Hanka mun m.a. etja kappi við hröðustu hjólreiðakonur landsins, þær Birnu Björnsdóttur sem sigraði tímatökumótið árið 2013, Maríu Ögn Guðmundsdóttur hjólreiðakonu Íslands árið 2013 og Stefanie Gegersen.