Enginn má framar spila númer fjögur hjá Internazionale

Argentínumaðurinn Javier Zanetti lagði skóna á hilluna í vor eftir nítján tímabil með ítalska liðinu Internazionale Milan.

Ítalska íþróttablaðið Gazzetta dello Sport birti í dag frétt um það að treyja númer fjögur hjá Inter verði hér eftir ósnertanleg.

Forráðamenn Internazionale Milan hafa ákveðið að enginn spili hér eftir númer fjögur til heiðurs þessa frábæra leikmanns. Javier Zanetti kom til Internazionale árið 1995 þegar hann var 22 ára gamall og lék sinn síðasta leik í maí þá á 41. aldursári.

Zanetti spilaði 858 leiki með Internazionale og tók þátt í að vinna sextán titla með félaginu. Zanetti lék einnig 145 landsleiki fyrir Argentínu en síðasta landsleikurinn hans var árið 2011.

Það er ekki nóg með að treyja Zanetti fari upp í rjáfur þá verður Argentínumaðurinn einnig varaforseti Internazionale.