Refsiaðgerðir gegn Rússum samþykktar

Evrópusambandið (ESB) samþykkti í kvöld nýjar refsiaðgerðir gegn Rússum vegna átakanna í Austur-Úkraínu. Aðgerðirnar taka þó ekki gildi strax. Aðgerðirnar munu meðal annars fela í sér takmarkað aðgengi rússneskra olíufyrirtækja að markaði ESB.

Herman Van Rompuy, forseti leiðtogaráðs ESB, segir þó allt velta á því hvort að ástandið í Úkraínu muni breytast og hvort vopnahlé muni haldast. Þá segir hann að með því að hrinda aðgerðunum ekki í framkvæmd strax, fáist meiri tími til að endurskoða ástandið.

Boðað var til aukafundar hjá Evrópusambandinu með skömmum fyrirvara og komu sendifulltrúar saman í dag til að ræða ástandið og hugsanlegar refsiaðgerðir. Niðurstöður höfðu ekki fengist í viðræðum fulltrúa aðildarríkja ESB um hvaða aðgerðum ætti að beita og var boðað til fundarins í kjölfarið.