Everton á eftir Alfreð

Alfreð Finnbogason er enn orðaður við félög í ensku úrvalsdeildinni en enska blaðið The Mirror greinir frá því í dag að Everton sé á höttunum eftir Alfreð.

Í frétt blaðsins kemur fram að félagið hafi sent njósnara á leik Heerenveen og PSV í hollenska boltanum í gær til þess að fylgjast með Alfreð.

Sagt er að Everton ætli að losa sig við króatíska framherjann Nikica Jelavic og reyna að kaupa Alfreð í staðinn í janúar.

Alfreð, sem er markahæstur í hollensku úrvalsdeildinni, hefur einnig verið orðaður við fleiri félög í ensku úrvalsdeildinni og líklegt að einhver tilboð komi í hann í janúar.