Kolbeinn í hópnum gegn AC Milan

Kolbeinn Sigþórsson hefur jafnað sig á ökklameiðslum sínum og er í leikmannahópi Ajax sem mætir AC Milan í Meistaradeild Evrópu á miðvikudagskvöldið.

Kolbeinn meiddist í fyrri umspilsleik Íslands gegn Króatíu í síðasta mánuði og missti því af fræknum 2-1 sigri Ajax á Barcelona fyrir tæpum tveimur vikum síðan.

Ajax þarf á sigri að halda á San Siro-leikvanginum í Mílanó á miðvikudaginn til að tryggja sér sæti í 16-liða úrslitum keppninnar.

Þeir Siem de Jong, Nicolai Boilesen og Lerin Duarte missa þó allir af leiknum vegna meiðsla og þá mun Joel Veltman taka út leikbann.

Barcelona er í efsta sæti H-riðils með tíu stig og mætir Celtic á heimavelli í lokaumferðinni. AC Milan er með átta stig og Ajax sjö. Tvö efstu liðin í riðlinum komast áfram í 16-liða úrslit keppninnar.