Jóhann Birnir framlengir um eitt ár

Jóhann Birnir Guðmundsson ætlar að spila með Keflavíkurliðinu í Pepsi-deildinni 2014 en hann hefur framlengt samning sinn um eitt ár. Þetta kemur fram á heimasíðu Knattspyrnudeildar Keflavíkur.

Jóhann Birnir er 36 ára gamall miðjumaður sem hefur spilað með Keflavík síðan að hann snéri heim úr atvinnumennsku sumarið 2008 en hann lék á sínum tíma sem atvinnumaður í Englandi, Noregi og Svíþjóð. Jóhann skoraði 4 mörk í 20 leikjum í Pepsi-deildinni í sumar.

Jóhann Birnir hefur spilað 146 leiki fyrir Keflavík í efstu deild og nálgast leikjahæstu leikmenn félagsins. Hann er sá sjötti markahæsti með sín 38 mörk.

„Það er ánægjulegt að Jóhann hafi ákveðið að halda áfram með liðinu enda var hann lykilmaður þar í sumar eins og undanfarin ár," segir í frétt á heimasíðu Keflavíkur en Kristján Guðmundsson mun áfram þjálfa liðið.