Átján klukkutíma bið á enda hjá Eiði Smára

Eiður Smári Guðjohnsen skoraði langþráð mark í 3-0 sigri

Club Brugge á Mechelen í belgísku úrvalsdeildinni á laugardagskvöldið.

Íslenski landsliðsmaðurinn var ekki búinn að skora í síðustu 25 leikjum sínum með Club Brugge og íslenska landsliðinu.

Eiður Smári skoraði ekki fyrir íslenska landsliðið á árinu og síðasta mark hans fyrir Club Brugge kom í leik á móti Genk í úrslitakeppni belgísku úrvalsdeildarinnar 21. apríl síðastliðinn.

Eiður Smári var búinn að spila í 1.082 mínútur án þess að skora þegar hann kom Club Brugge í 2-0 á 35. mínútu leiksins. Þetta þýðir að Eiður var búinn að bíða eftir markinu í 230 daga og í meira en 18 klukkutíma þegar litið er á spilaðar mínútur.