Íslensku stelpurnar lykillinn að árangri

Ljóst er að nýtt nafn verður skrifað á bikarinn í knattspyrnukeppni NCAA kvennamegin í ár. Dagný Brynjarsdóttir, Berglind Björg Þorvaldsdóttir og stöllur þeirra í háskólaliði Florida State eru komnar í undanúrslitin og þykja líklegar til afreka.

Florida State, sem vann sigur í Atlantshafsdeildinni á dögunum, mætir Virginia Tech í kvöld. Í hinum leiknum mætast Virginia og UCLA. Þegar kemur að kvennaknattspyrnu er ljóst að styrkleiki í efstu deild háskólaboltans vestanhafs jafnast á við við margar deildir í Evrópu.

Í upphitun ESPN fyrir undanúrslitin í kvöld er farið yfir styrkleika og veikleika hvers liðs fyrir sig. Í umfjölluninni um Florida State er liðið sagt sérstaklega alþjóðlegt líkt og undanfarin ár. Þannig hafi þjálfarinn Mark Krikorian horft langt út í heim til þess að styrkja sitt lið.

Alls hafi 21 leikmaður utan Bandaríkjanna spilað undir stjórn Krikorians hjá skólanum frá árinu 2005. Sumir hafi slegið í gegn en aðrir farið heim með skottið á milli lappanna.

Þriðja árið í röð og sjötta tímabilið af níu í tíð Krikorians hefur Florida State komist í undanúrslit. Stuðningsmenn skólans bíða spenntir eftir því að sjá hvort liðinu takist að brjóta undanúrslitamúrinn. Blaðamaður ESPN segir lykilinn að því að stíga skrefið stóra felast í einu landi og tveimur leikmönnum, Íslendingunum Berglindi og Dagnýju.

Dagný spilar fremst á miðjunni fyrir aftan Berglindi sem er í stöðu framherja. Báðar hafa skorað mörg mörk og mikilvæg á tímabilinu.

„Þær hreyfa sig vel með og án bolta,“ segir Chugger Adair, þjálfari mótherjanna í Virgnia Tech, sem tvívegis hefur mátt sætta sig við tap fyrir Florida State á tímabilinu.

„Þær eru kannski ekki fljótustu leikmennirnir en klókir, líkamlega sterkir og geta breytt gangi leiksins á skömmum tíma.“

Dagný skoraði sigurmarkið í úrslitaleik Atlantshafsdeildarinnar á dögunum. Adair segir þær íslensku láta finna vel fyrir sér og nýta reynslu sína vel þegar mikið liggi við. Vísar hann þar meðal annars í reynslu Dagnýjar með kvennalandsliði Íslands. 

Leikurinn hjá Berglindi og Dagnýju í kvöld hefst klukkan 22.