Margir í liðinu hafa spilað mikilvæga leiki

„Ég er nú persónulega ekki hrifinn af því að æfa inni,“ segir Kári Árnason, leikmaður íslenska landsliðsins, á æfingu íslenska liðsins í gær en hún fór fram í Kórnum vegna veðurs.

„Það gera allir leikmenn í liðinu sér grein fyrir því hvað er undir og að þetta eru stærstu leikir sem íslenska landsliðið hefur spilað. Margir leikmenn liðsins hafa aftur á móti spilað mikilvæga leiki hjá sínum félagsliðum og því er ekkert stress í hópnum, bara gaman.“

Það mun mæða mikið á Kára og félögum í öftustu víglínu í leikjunum gegn Króatíu.

„Það er gríðarlega mikilvægt fyrir okkur að halda markinu hreinu sérstaklega í ljósi þess að mark á útivelli í svona einvígum telur í raun tvöfalt. Hvernig sem fyrri leikurinn fer er samt bara mikilvægast að ná fram hagstæðum úrslitum fyrir okkur.“