Þjálfarinn vill Dagnýju til Japans

Dagný Brynjarsdóttir tryggði háskólaliði Florida State sigur í úrslitaleik Atlantshafsdeildarinnar á sunnudaginn. Landsliðskonan hefur farið á kostum á tímabilinu, raðað inn mikilvægum mörkum og verið heiðruð fyrir frammistöðuna.

„Ég var einn af lykilmönnum liðsins í fyrra en þurfti að rísa upp í ár og leiða liðið áfram,“ segir Dagný, sem er á þriðja ári sínu við skólann. Sex lykilmenn útskrifuðust úr skólanum í vor og því var ábyrgðin mikil á herðum Dagnýjar sem býr vel að reynslu sinni með landsliðum Íslands.

Dagný og félagar töpuðu aðeins einum leik í Atlantshafsdeildinni í vetur og þykja þær sigurstranglegar fyrir úrslitakeppnina sem fram undan er.

„Við komumst í undanúrslit síðustu tvö ár og töpuðum í bæði skiptin,“ segir Dagný. Hún telur möguleika liðsins þó mikla í ár. Liðið sé sterkt, haldi boltanum vel og hin liðin þreytist.

Dagný hefur frá árinu 2007 spilað með Val en undanfarin þrjú ár þurft að halda utan til Bandaríkjanna á miðju tímabili. Hún segir ekkert ákveðið hvar hún spili næsta sumar.

„Ég er samningslaus eins og er. Það eru nokkur lið búin að tala við mig en ég sagði öllum að ég ætlaði að einbeita mér að skólanum og klára deildina,“ segir Dagný. Fleira komi til greina en að spila á Íslandi. Þjálfari hennar vill að hún æfi með akademíu í Japan og þá hefur hún sjálf áhuga á að reyna fyrir sér í sumardeild vestanhafs.

„Ég ætla ekki að byrja að hugsa um þetta fyrr en í desember.“

Auk Dagnýjar hefur Berglind Björg Þorvaldsdóttir staðið sig vel í fremstu víglínu liðsins.

„Hún er farin að banka á landsliðsdyrnar. Það eru stelpur heima valdar í liðið og deildin hérna er sterkari en deildin heima.“