Árás á gíslatökumenn olli stórskemmdum

Miklar skemmdir á verslunarmiðstöðinni í Naíróbi stafa af aðgerðum keníska hersins gegn gíslatökumönnum, sem lögðu undir sig bygginguna á laugardaginn fyrir viku.

Þetta viðurkenndi háttsettur kenískur embættismaður í viðtali við AP fréttastofuna í dag.

Þegar herinn réðst til atlögu gegn gíslatökumönnunum á mánudag, skutu hermenn sprengjuflaugum inn í verslunarmiðstöðina. Fjórar miklar sprengingar heyrðust og þykkur reykur barst frá húsinu.

Embættismaðurinn staðfestir að sprengjuflaugunum hafi verið skotið, en vill ekki staðfesta að skemmdirnar hafi stafað af þeim.

Þegar aðgerðum hersins var lokið höfðu þrjár hæðir hrunið og stórt gat blasti við á þaki byggingarinnar.

Svo virðist sem þetta hrun í hluta byggingarinnar hafi ráðið úrslitum um að gíslatökumennirnir náðust. Enn er ekki vitað hvort það hafi valdið dauða fleiri gísla.

Nú er talað um að átökin hafi kostað að minnsta kosti 67 manns lífið, en nokkuð ljóst þykir að fleiri lík muni finnast í rústunum.