Lamaður fær ekki fullar bætur vegna ölvunar

Maður sem lamaðist í slysi við sumarbústað í nóvember árið 2009 fær ekki óskertar bætur úr frítímaslysatryggingu frá VÍS þar sem hann var ölvaður er slysið varð.



Maðurinn var að vinna í sumarbústað í Árnessýslu ásamt fjölskyldu. Um nóttina féll hann ofan á grunnplötu byggingar sem tengdi sumarhúsið við nýbyggingu sem þar var verið að reisa. Upp úr grunnplötu tengibyggingarinnar stóðu óvarin steypustyrktarjárn sem maðurinn féll á úr rúmlega þriggja metra hæð og stungust járnteinarnir víða í gegnum líkama hans.

Alls gengu átta járn í gegnum manninn og þurfti að skera sjö þeirra í sundur með slípirokki, áður en unnt var að flytja hann með þyrlu af slysstað.

Maðurinn er lamaður fyrir neðan brjóst af völdum slyssins og hlaut hann að auki margvíslega aðra áverka.

Fátt er vitað um ástæður þess að maðurinn féll en sjálfur telur hann að hann hafi gengið í svefni.

Í niðurstöðu dómsins segir að hann hafi drukkið áfengi um nóttina og að ölvun hans hafi haft áhrif á að slysið var. Þá var einnig litið til þess að svo maðurinn gæti fallið út um dyraopið þurfti hann að fara að dyrunum, taka golfpokana sem fyrir henni voru frá og opna dyrnar. Var því tryggingafélagið sýknað.