"Færeyingar ættu að krossleggja fingur og tær fyrir Ísland“

Heri Simonsen skrifar leiðara í færeyska dagblaðið Sosialurin þar sem hann fjallar um leiki íslensku frændanna við Króata.

„Það er ekki að ástæðulausu að Ísland er komið í þessa stöðu. Þjóðin á leikmenn í stórum evrópskum deildum og ekki bara hjá einhverjum meðalfélögum,“ segir í leiðaranum.

Þá er fjallað um sænska landsliðsþjálfarann (færeyska: landsliðsvenjaran) Lars Lagerbäck og hversu góð ákvörðun það var hjá Knattspyrnusambandi Íslands að ráða hann til starfa.

„Það hefði mikla þýðingu fyrir aðrar smáþjóðir ef Íslandi, sem yrði fámennasta þjóðin í sögunni til þess, tækist að tryggja sæti sitt í lokakeppni HM,“ skrifar Heri Simonsen.

„Það verður ekki létt en færeyskir knattspyrnuunnendur ættu að krosslegja bæði fingur og tær fyrir að Ísland nái sínu mesta íþróttaafreki í sögunni.“

Leiðarann má sjá í heild sinni hér að neðan.