Býst við að sumir fái á baukinn

"Mér finnst að þetta eigi að vera þannig að maður eigi að skjóta aðeins á félagana í þessum bransa," segir sjónvarpsmaðurinn Logi Bergmann Eiðsson. "Ég held að manni leyfist aðeins meira á þessu kvöldi en manni myndi leyfast venjulega."

Logi verður kynnir á Edduverðlaununum annað árið í röð á laugardaginn. Hátíðin verður haldin í Eldborg í Hörpu og verður sýnd í beinni útsendingu á Stöð 2 og hér á Vísi.

Logi Bergmann vakti athygli á Eddunni í fyrra fyrir að skjóta laufléttum skotum á hina ýmsa aðila innan sjónvarps- og kvikmyndabransans við góðar undirtektir gesta, nema kannski þeirra sem grínið beindist að.

Aðspurður segist hann hafa fengið góð viðbrögð í fyrra við gríninu sínu. "Ég held að þetta sé það sem menn vilja. Það var ábyggilega einhver fúll en ef menn eru fúlir segja þeir venjulega ekkert rosalega mikið við mann. Í staðinn fækkar vinunum allt í einu á Facebook, eða eitthvað," segir hann og hlær.

Logi Bergmann var ekki byrjaður á að semja opnunaratriðið sitt í gær en býst fastlega við því að einhverjir fái á baukinn. "Ég er ekki alveg búinn að ákveða í hvaða átt ég ætla að fara. Þannig séð á þetta að vera annáll á kvikmyndaárinu, þannig að ég mun rifja upp það sem gekk og gekk ekki," segir hann. "Það er alltaf skemmtileg stemning á þessu kvöldi alveg þangað til þetta er búið og allir eru komnir í fýlu yfir því að hafa ekki unnið." Hægt er að sjá upphafsatriði Loga frá Eddunni í fyrra hér fyrir ofan og á Vísir Sjónvarp