Bökuðu þúsund bollakökur sem kláruðust strax

Sjöfn og eiginmaður hennar Lárus B. Lárusson eru búsett á Seltjarnarnesi og hafa löngum tekið virkan þátt í því að hvetja hlaupara í maraþoninu.

„Við hjónin vorum frumkvöðlar í því að standa fyrir alvöru klappliði og morgunverðarhlaðborði fyrir hlauparana í Reykjavíkurmaraþoni Íslandsbanka á Lindarbrautinni á Seltjarnarnesi fyrir þó nokkuð mörgum árum. 

Við fengum íbúana á Lindarbrautinni til að taka þátt með því að safnast út fyrir framan heimili sín, flagga og skreyta og hvetja hlauparana til dáða. Þetta er orðið að hefð og margir taka þátt enn í dag.“

Í ár fékk Íslandsbanki leyfi til að segja sögu hjónanna.

„Markmiðið var og er að hvetja fólk til að taka þátt í hlaupinu með því að hvetja hlauparana í dáða og láta vita að hvatning skiptir ekki síður máli eins og að hlaupa.

Í tilefni aukins sýnileika ákváðum við hjónin að gera enn betur og bjóða upp á enn fleiri bollakökur og fara yfir markið, baka þúsund bollakökur með Bakarameistaranum og gleðja hlauparana. Það sló heldur betur í gegn,“ segir Sjöfn brosandi og bætir við:

„Við erum svo þakklát fyrir alla hjálpina, fyrir Sigrúnu Sól hjá Bakarameistaranum, Ölgerðina, Partýbúðina og Garðaþjónustuna fyrir að aðstoða okkur við að ná þessu markmiði og Evu Björk, ljósmyndara og Elínu Helgu fyrir að fanga gleðina sem var við völd á mynd.“

en hér má sjá vel valdar myndir frá fjörinu: